Exodus 26

IThabanikeli

1“Lizakwenza ithabanikeli ngamakhe-theni alitshumi elembu eliphethelwe kuhle ngezintambo eziluhlaza, leziyibubende kanye lezibomvu, abe lamakherubhi elukelwe kuwo ngumuntu oleminwe. 2Amakhetheni wonke kumele ukuthi alingane – elesilinganiso sezingalo ezingamatshumi amabili lesificamibili ubude, kuthi ububanzi abe yizingalo ezine.

3Lizahlanganisa amakhetheni amahlanu ndawonye, liphinde lenze njalo lakwamanye amahlanu. 4Lizakwenza izihitshela ngokuluhlaza emphethweni wekhetheni elisekucineni kwamakhetheni amahlanu, lenze njalo lasemphethweni wekhetheni lokucina kwamanye amakhetheni. 5Lizakwenza izihitshela ezingamatshumi amahlanu ekhethenini elilodwa liphinde lenze ezinye izihitshela ezingamatshumi amahlanu ekhethenini lokucina kwamanye amakhetheni amahlanu, izihitshela zikhangelene. 6Emva kwalokho lizakwenza izingwegwe zegolide ezingamatshumi amahlanu lizisebenzise ukuhlanganisa amakhetheni ukuze ithabanikeli libe yintonye.

7“Yenzani amakhetheni ngoboya bembuzi abe ngawethente phezu kwethabanikeli – itshumi lanye esewonke. 8Amakhetheni wonke alitshumi lanye alingane – isilinganiso esizingalo ezingamatshumi amathathu ubude, lobubanzi obuzingalo ezine. 9Hlanganisani amakhetheni amahlanu kube yintonye kuthi ayisithupha liwenze okufananayo. Goqani ikhetheni lesithupha liphindwe kabili ngaphambi kwethente. 10Yenzani izihitshela ezingamatshumi amahlanu zilandele umphetho wekhetheni elisekucineni koluhlu lwakuqala, lenze njalo lakolunye uluhlu. 11Libeselilungisa izingwegwe zethusi ezingamatshumi amahlanu lizifake ezihitshelweni ukubopha ithente kube yintonye. 12Kuzakuthi-ke isiqa esiseleyo sekhetheni lethente, ingxenye yekhetheni eseleyo, ilenge emuva kwethabanikeli.

13Amakhetheni ethente azakwedlula ngengalo eyodwa inxa zonke, kuthi okuseleyo kulenge emaceleni ethabanikeli ukuze alembese.

14Lungiselani isembeso sethente ngezikhumba zenqama eziphendulwe ngomphendulo obomvu, kuthi phezu kwalokho kube lesembeso sezikhumba zenyamazana zolwandle.

15“Yenzani amapulanka amiswayo ethabanikeli ngezigodo zesihlahla somakhakhiya.

16Ipulanka linye libe lide okwezingalo ezilitshumi, kuthi ububanzi bube yingalo elengxenye, 17kulemisuka emibili ephutshayo ilinganisene. Wonke amapulanka ethabanikeli enziwe ngale indlela. 18Yenzani amapulanka amiswayo angamatshumi amabili eceleni leningizimu lethabanikeli.

19Libeselizenza izisekelo zesiliva ezingamatshumi amane ezizahamba ngaphansi kwawo – izisekelo ezimbili epulankeni linye, sisinye ngaphansi komsuka. 20Leli elinye icele, icele lenyakatho lethabanikeli, misani amapulanka angamatshumi amabili 21kanye lezisekelo zesiliva ezingamatshumi amane – ezimbili ngaphansi kwepulanka linye. 22Yenzani amapulanka ayisithupha awecele elingale ekucineni ngentshonalanga yethabanikeli,

23limise amapulanka amabili asemagumbini asekucineni. 24Emagumbini womabili kawabe lohlonzi oluphindwe kabili kusukela phansi kusiya phezulu, abesehlanganiswa ngesongo elilodwa, wonke abe njalo. 25Kutsho ukuthi kuzakuba lamapulanka aficamibili lezisekelo zesiliva ezingamatshumi ayisithupha – ezimbili ngaphansi kwepulanka linye.

26“Yenzani njalo imithando ngezigodo zesihlahla som-akhakhiya: emihlanu ibe ngeyamapulanka emiyo kwelinye icele lethabanikeli, 27emihlanu ibe njalo ngeyakwelinye icele, kuthi eminye njalo emihlanu ibe ngeyamapulanka entshonalanga, ekucineni kwethabanikeli. 28Umthando waphakathi uzakwedlula usuka ngapha usiya ngale laphakathi kwamapulanka amiyo.

29Huqani amapulanka ngegolide lenze amasongo egolide abambe imithando. Njalo huqani imithando ngegolide.

30“Misani ithabanikeli njengokutshengiswa kwakho entabeni.

31“Yenzani ikhetheni ngelembu eliphethelwe kuhle ngentambo eziluhlaza, leziyibubende kanye lezibomvu, abe lamakherubhi elukelwe kuwo ngumuntu oleminwe. 32Alengise endaweni ezine ngezingwegwana zegolide ezigodweni zesihlahla som-akhakhiya ezihuqwe ngegolide njalo zamiswa phezu kwezisekelo zesiliva. 33Lengisani-ke ikhetheni ngezingwegwana libeselibeka ibhokisi loBufakazi ngemuva kwekhetheni. Ikhetheni lizakwehlukanisa Indawo Engcwele kweNgcwele Ngcwele.

34Bekani isisibekelo esiyisihlalo somusa phezu kwebhokisi loBufakazi elisendaweni eNgcwele Ngcwele.

35Bekani itafula ngaphandle kwekhetheni elisenyakatho kwethabanikeli, beselifaka uluthi lwesibane lukhangelane layo eceleni ngeningizimu. 36“Yenzani ikhetheni lesango lethente ngelembu eliphothelwe kuhle ngezintambo eziluhlaza, leziyibubende kanye lezibomvu kube ngumsebenzi womaluki.

37Yenzelani ikhetheni ingwegwana zegolide kanye lezinsika ezinhlanu ezenziwe ngezigodo zesihlahla som-akhakhiya ezihuqwe ngegolide, libe selizenzela izisindo ezinhlanu ezibunjwe ngethusi.